डेंग्यू रुग्णसंख्येबाबत वैद्यकीय विभागाचे लपवाछपवी!

नाशिक (प्रतिनिधी) :  शहरात डेंग्यूचा उद्रेक झाला असून, त्यावर नियंत्रण करण्यात अपयश आलेल्या मनपाच्या वैद्यकीय विभागाकडून आता डेंग्यू रुग्णांचे आकडे लपविण्याचा प्रयत्न केला जात आहे. याच कारणावरून शहरातील आमदारांनी दोन दिवसांपूर्वी आरोग्य वैद्यकीय विभागाची कानउघडणी करत खासगी रुग्णालयांकडून रुग्णांची माहिती येत नसेल तर त्याची जबाबदारी कुणाची? असा प्रश्न केला. ऑगस्ट तिस-या आठवड्यापर्यंत डेंग्यूचे ३०४ रुग्ण आढळून आले होते. तर जानेवारी ते २४ ऑगस्ट या कालावधीपर्यत शहरात ८८० डेंग्यूचे रुग्ण असल्याचे आधी जाहीर करणा-या मनपा वैद्यकीय विभागाने घुमजाव केले आहे. डेंग्यूची रॅपिड टेस्ट पॉझिटिव्ह धरली जात नाही. परंतु, खासगी रुग्णालयांनी १०५ रुग्णांचे अहवाल पॉझिटिव्ह धरल्यानेच रुग्णांची संख्या ८८० पर्यंत गेल्याचे स्पष्टीकरण देण्यात आले आहे.

मनपा वैद्यकीय विभागाने दिलेल्या स्पष्टीकरणामुळे आता  ऑगस्टमध्ये ३०४ ऐवजी २१२ बाधित तर जानेवारीपासून आतापर्यंत ७७५ डेंग्यूचे रुग्ण असल्याचे सांगण्यात येत आहे. यंदा मे महिन्यात शहरात डेंग्यूचे ३९ रुग्ण आढळून आले होते. जूनच्या पहिल्या आठवड्यात गोविंदनगरमधील ५० वर्षीय रुग्णाचा तापाने मृत्यू झाला. महिनाभरात १५५ बाधित रुग्ण आढळले. त्यानंतर जुलै महिन्यात रुग्णसंख्या ४३४ वर गेली. ऑगस्टच्या तीन आठवड्यात ३०४ बाधित आढळून आले. तर दुसरीकडे प्रशासनाने मात्र संबंधीत आकडेवारी ही ३०४ नसल्याचे स्पष्ट करत आकड्यांची लपवाछपवी सुरू केली आहे.