आखेर रेल्वेच्या मदतीला धावली एसटी : नाशिकहून १२४ बसेस मुंबईकडे रवाना

नाशिक (प्रतिनिधी) : मुसळधार पावसामुळे रेल्वे मार्गावर दरडी कोसळणे आणि झाड पडल्यामुळे मुंबई ते मनमाड ही मध्य रेल्वेची सेवा रविवारी संपूर्णपणे कोलमडली. यामुळे मुंबईकडे जाणा-या प्रवाशांची गैरसोय झाली. रेल्वे ट्रॅक दुरुस्त होण्यास लागणारा विलंब पाहता एसटी रेल्वेच्या मदतीला धावून आली. एसटी महामंडळाने नाशिकहून कसारा आणि मुंबईसाठी दिवसभरात एकूण १२४ जादा बसेस सोडल्या. यामुळे प्रवाशांना चांगलाच दिलासा मिळाला.

मध्य रेल्वेच्या वाशिंद व खडवली स्थानकांदरम्यान मुसळधार पाऊस, दरड कोसळणे, रेल्वे मार्गाखालील खडीचा भराव वाहून जाण्याच्या घटनांमुळे मुंबई-मनमाड दरम्यानची रेल्वे वाहतूक विस्कळीत झाली होती. मुंबईकडे जाणारी राजधानी एक्स्प्रेस नाशिकरोड स्थानकात थांबविण्यात आली. मुंबईकडे जाणा-या आणि येणा-या ११ रेल्वेगाड्यांची वाहतूक पुणे, दौंडमार्गे वळविण्यात आली. काही रेल्वेगाड्या वेगवेगळ्या स्थानकांवर थांबवून माघारी वळवण्यात आल्या. यामुळे मुंबईकडे जाणा-या नाशिकरोड स्थानकावरील प्रवाशांचे हाल झाले. सकाळपासून रेल्वेची वाट पाहणा-या प्रवाशांना ट्रॅक केव्हा सुरळीत होईल, याविषयी कोणीही माहिती देत नव्हते. मुंबईकडे जाणारी राजधानी एक्स्प्रेस नाशिकरोड रेल्वे स्थानकावर थांबविण्यात आली. प्रवाशांना मुंबईला जाण्यासाठी बसेसची व्यवस्था केली जाणार असल्याचे रेल्वेच्या अधिका-यांकडून सांगण्यात आले. सेवाग्राम एक्स्प्रेस देवळाली रेल्वे स्थानकावर थांबवून माघारी वळविण्यात आली. या रेल्वेतील प्रवाशांसाठी २० बसेसची व्यवस्था एसटी महामंडळाने केली. मुंबईकडे जाणारी पंचवटी एक्स्प्रेसही इगतपुरी रेल्वे स्थानकावर खंडित करण्यात आली. रिकामी गाडी पुन्हा मनमाडला आणली गेली.