खोट्या गुन्ह्यात अडकविण्याची धमकी देत खंडणीची मागणी

नाशिक (प्रतिनिधी): खोट्या गुन्ह्यात अडकविण्याची धमकी देत एकाने महिलेकडे पन्नास लाख रुपयांची खंडणी मागितल्याचा प्रकार समोर आला आहे. विशेष म्हणजे पोलिस आयुक्तालय परिसरात हा प्रकार घडला असून, याप्रकरणी सरकारवाडा पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, बाळासाहेब दत्तात्रेय भोर (वय ५०, रा. राजपाल कॉलनी, मखमलाबाद नाका) असे गुन्हा दाखल करण्यात आलेल्या संशयिताचे नाव आहे. याबाबत महात्मानगर भागात राहणाºया एका महिलेने फिर्याद दिली आहे. त्यात म्हटले आहे की, २०१७ पासून संशयित महिलेस त्रास देत असून, त्याने वेगवेगळ्या कार्यालयांत महिलेविरोधात खोट्या तक्रारी दिल्या आहेत. शुक्रवारी (दि. ७) महिला जबाब नोंदविण्यासाठी पोलिस आयुक्तालय भागात आली असताना ही घटना घडली. संशयिताने आयुक्तालयापासून काही अंतरावर महिलेची वाट अडवून बलात्कार करण्याची धमकी दिली. यावेळी त्याने पन्नास लाख रुपयांच्या खंडणीची मागणी करीत दहा वर्षे शिक्षा असलेल्या खोट्या गुन्ह्यात अडकविण्याची धमकी दिल्याचे तक्रारीत नमूद करण्यात आले आहे. अधिक तपास उपनिरीक्षक टिपरे करीत आहेत.