नाशिक (प्रतिनिधी): : नाशिक–पुणे सेमी-हायस्पीड रेल्वे प्रकल्पाच्या मार्गात मोठा फेरबदल करत रेल्वे मंत्रालयाने शिर्डी (अहिल्यानगर) – पुणतांबा या नव्या मार्गाला प्राथमिक मंजुरी दिली आहे. सुरुवातीला मांडण्यात आलेला सिन्नर – संगमनेर – आळेफाटा – नारायणगाव – मंचर – चाकण हा मार्ग बदलण्यात आल्याने प्रकल्पाची दिशा आता पूर्णपणे बदलली आहे. रेल्वेमंत्र्यांनी दिलेल्या माहितीनुसार, जीएमआरटी (GMRT) संशोधन केंद्राच्या संवेदनशील परिसरातून रेल्वे मार्ग गेल्यास होणारे तांत्रिक व रेडिओ-वेधशाळेवरील दुष्परिणाम टाळण्यासाठी हा मार्ग बदल करणे आवश्यक होते. त्यामुळे वैज्ञानिक व तांत्रिक अडथळा दूर होऊन प्रकल्पाला गती मिळणार असल्याचे मंत्रालयाचे म्हणणे आहे. मध्य रेल्वेद्वारे हा प्रकल्प राबविला जाणार असून भूसंपादनाची प्रक्रिया लवकरच सुरू करण्याचे संकेत त्यांनी दिले आहेत. शिर्डीमार्गे नवा मार्ग अधिक प्रवासीक्षम आणि विस्तारक्षम असल्याचेही रेल्वे प्रशासनाचे मत आहे.
विरोधाची सूरही चढू लागले: मार्गबदलाच्या निर्णयावर मात्र विरोधाची लाटही उमटू लागली आहे. मूळ प्रस्तावित मार्गावरील सिन्नर, संगमनेर, आळेफाटा, मंचर परिसरातील लोकप्रतिनिधी, व्यापारी, उद्योगपती आणि नागरिकांनी या बदलावर नाराजी व्यक्त केली आहे.
संगमनेर अहिल्यानगर क्षेत्राची मोठी उपेक्षा: सांगमनेर व पश्चिम अहमदनगर परिसरातील लोकांचे म्हणणे आहे की, दशकांपासून या भागाला रेल्वेचा अभाव आहे. मूळ मार्गामुळे प्रथमच या विभागाला थेट रेल्वे संपर्क मिळणार होता; मात्र मार्ग बदलामुळे हा फायदा पुन्हा दूर गेला आहे.
स्थानिक अर्थव्यवस्थेला फटका : मूळ मार्गावर असलेल्या वाढत्या उद्योगगटांना, लॉजिस्टिक पार्कना आणि द्राक्ष–कांदा उत्पादकांना याचा थेट लाभ मिळणार होता. आता हा मार्ग वळवल्याने विकासाचे केंद्र शिर्डीकडे सरकल्याची भावना व्यक्त होत आहे.
राजकीय हस्तक्षेपाचा आरोप: काही स्थानिक संघटनांनी मार्गबदलाच्या निर्णयामागे राजकीय दबाव असल्याची शक्यता वर्तवली आहे. शिर्डी क्षेत्रातील वाढता धार्मिक व आर्थिक प्रभाव हा निर्णयात दिसून येतो, असा आरोप विरोधक करत आहेत.
वाहतूक तज्ञांचे प्रश्न: वाहतूक तज्ञांच्या मते, शिर्डीमार्गे जाणारा मार्ग नाशिक–पुणे दरम्यानचा सर्वात सरळ किंवा सर्वात वेगवान पर्याय नाही. सांगमनेरमार्गे मार्ग छोटा आणि भौगोलिकदृष्ट्या संतुलित ठरला असता, असे मत तज्ज्ञांनी नोंदवले आहे.
स्थानिकांकडून पुनर्विचाराची मागणी: नव्या मार्गाने जीएमआरटीचा प्रश्न सुटला असला तरी, मूळ मार्गावर असलेल्या शहरांनी व नागरिकांनी निर्णयात पारदर्शकता नसल्याची खंत व्यक्त केली आहे. त्यामुळे मार्गाचा पुनर्विचार करावा किंवा दोन्ही मार्गांवरील तांत्रिक अहवाल सार्वजनिक करावेत, अशी मागणी वाढत आहे. रेल्वे मंत्रालयाकडून पुढील काही दिवसांत अधिकृत सविस्तर निवेदन अपेक्षित आहे. प्रकल्पाचे भूसंपादन सुरू होताच विरोध आणखी तीव्र होण्याची शक्यता तज्ज्ञ व्यक्त करत आहेत.
