नाशिक (प्रतिनीधी): सामान्य कुटुंबातील परिस्थिती, अपुरी साधनसामग्री आणि असंख्य अडचणींवर मात करत गंगावेश तालमीच्या पैलवान किशोर पवार यांनी आंतरराष्ट्रीय कुस्तीच्या व्यासपीठावर भारताचा तिरंगा अभिमानाने फडकावला आहे. मलेशिया येथे नुकत्याच पार पडलेल्या आंतरराष्ट्रीय कुस्ती स्पर्धेत ५७ किलो वजन गटात त्यांनी सुवर्णपदक पटकावत देशासाठी ऐतिहासिक कामगिरी केली आहे.
किशोर पवार यांची कुस्तीची सुरुवात लहान वयातच झाली. बालपणापासूनच कुस्तीच्या मातीशी नातं जुळवत त्यांनी गंगावेश तालमीमध्ये नियमित सराव सुरू केला. आर्थिक मर्यादा, प्रशिक्षणासाठी आवश्यक असलेल्या साधनसामग्रीचा अभाव, प्रवास व स्पर्धांचा खर्च अशा अनेक अडचणींना सामोरे जात असतानाही त्यांनी कधीही हार मानली नाही. रोजचा कठोर सराव, शिस्तबद्ध जीवनशैली आणि जिद्दीच्या जोरावर त्यांनी स्वतःला घडवले. जिल्हा पातळीपासून सुरू झालेला त्यांचा प्रवास राज्य आणि राष्ट्रीय स्तरापर्यंत पोहोचला. विविध स्पर्धांमध्ये त्यांनी सातत्यपूर्ण यश संपादन करत प्रशिक्षक, कुस्तीप्रेमी आणि निवड समितीचे लक्ष वेधून घेतले. त्यांच्या मेहनतीचे चीज म्हणून त्यांची आंतरराष्ट्रीय स्पर्धेसाठी निवड झाली आणि या संधीचे त्यांनी सुवर्णपदक जिंकून सोनेरी रूपांतर केले.
या उल्लेखनीय यशाची दखल जालनेकर सराफ अमोलभाऊ यांनी घेत किशोर पवार यांचा सत्कार करून अभिनंदन केले. किशोर पवार यांच्या यशामुळे गंगावेश तालीम आणि परिसरातील कुस्तीपरंपरेचा नावलौकिक अधिकच वाढला आहे. या विजयामुळे स्थानिक क्रीडाप्रेमी, कुस्ती प्रशिक्षक, माजी पैलवान तसेच नवोदित खेळाडूंमध्ये उत्साहाचे वातावरण निर्माण झाले आहे. आजच्या काळात मोबाईल, सोशल मीडियाच्या दुनियेत गुंतलेल्या तरुणांसाठी किशोर पवार यांचा संघर्ष आणि यशाचा प्रवास आदर्श ठरत आहे. मेहनत, संयम, चिकाटी आणि आत्मविश्वास असेल तर कोणतीही परिस्थिती अडथळा ठरू शकत नाही, हा संदेश त्यांनी आपल्या यशातून दिला आहे. किशोर पवार यांचे हे सुवर्णयश केवळ वैयक्तिक नसून संपूर्ण जिल्हा, राज्य आणि देशासाठी अभिमानास्पद आहे. भविष्यातही ते आंतरराष्ट्रीय स्तरावर भारतासाठी अधिक पदके जिंकतील आणि देशाच्या कुस्ती क्षेत्रात नवा इतिहास घडवतील, अशी अपेक्षा व्यक्त केली जात आहे. या प्रसंगी अमोल जालनेकर, जलनेकर ग्रुपचे अध्यक्ष व जालनेकर सराफचे संचालक यांनी किशोर पवार यांना पुढील वाटचालीस हार्दिक शुभेच्छा दिल्या. यावेळी वज्रकाय हनुमान मंदिराचे अध्यक्ष करण शिंदे, पैलवान निलेश सूर्यवंशी यांच्यासह कुस्तीप्रेमी मोठ्या संख्येने उपस्थित होते.
