राष्ट्रवादी काँग्रेसचे मुकेश शहाणे यांची माघार; सानप यांची अविरोध निवड
नाशिक : नाशिक महानगरपालिकेच्या स्थायी समितीच्या सभापतिपदी मच्छिंद्र सानप यांची बुधवारी (दि. २५) अविरोध निवड करण्यात आली. राष्ट्रवादी काँग्रेसचे सदस्य मुकेश शहाणे यांनी पक्षश्रेष्ठींच्या सूचनेनुसार उमेदवारी अर्ज माघारी घेतल्याने सानप यांच्या निवडीचा मार्ग मोकळा झाला. महापालिकेच्या स्थायी समिती सभागृहात झालेल्या निवडणुकीची प्रक्रिया पीठासन अधिकारी आयुष प्रसाद यांच्या अध्यक्षतेखाली पार पडली. सभापती पदासाठी एकूण दोन उमेदवारांनी नामनिर्देशनपत्र दाखल केले होते. मात्र, माघारीच्या मुदतीत मुकेश शहाणे यांनी उमेदवारी मागे घेतली. त्यानंतर मच्छिंद्र सानप यांची बिनविरोध निवड झाल्याची अधिकृत घोषणा करण्यात आली.
निवडीची घोषणा होताच सभागृहात उपस्थित पदाधिकारी व सदस्यांनी सानप यांचे अभिनंदन केले. यावेळी महापौर हिमगौरी आहेर-आडके, उपमहापौर विलास शिंदे, आमदार देवयानी फरांदे, राष्ट्रवादी काँग्रेसचे शहराध्यक्ष रंजन ठाकरे, भाजप शहराध्यक्ष सुनील केदार, माजी आमदार बाळासाहेब सानप, भाजप गटनेते अॅड. शाम बडोदे, शिवसेना गटनेते अजय बोरस्ते, महानगरप्रमुख प्रवीण तिदमे, भाजपचे शहर उपाध्यक्ष नीलेश बोरा, माजी स्थायी समिती सभापती गणेश गिते, ज्येष्ठ नगरसेवक सुधाकर बडगुजर, राजेश आहेर तसेच स्थायी समिती सदस्य आणि नगरसचिव मदन हरिश्चंद्र उपस्थित होते.
दरम्यान, राष्ट्रवादी काँग्रेसचे नगरसेवक मुकेश शहाणे यांनी यापूर्वी प्रदेशाध्यक्ष सुनील तटकरे यांची भेट घेऊन सभापतिपद राष्ट्रवादी काँग्रेसला मिळावे, अशी मागणी केली होती. पक्षश्रेष्ठींकडून मिळालेल्या निर्देशांचे पालन केले जाईल, असे त्यांनी स्पष्ट केले होते. त्यानुसार निवडणूक प्रक्रियेदरम्यान त्यांनी उमेदवारी अर्ज माघारी घेतला. स्थायी समिती ही महापालिकेतील महत्त्वाची निर्णयप्रक्रिया करणारी संस्था असून, आर्थिक व प्रशासकीय विषयांवरील अंतिम निर्णय प्रक्रियेत सभापतीची भूमिका अत्यंत महत्त्वाची मानली जाते. सानप यांच्या निवडीमुळे महापालिकेतील सत्तासमीकरणात नव्या घडामोडींना वेग येण्याची शक्यता व्यक्त केली जात आहे.
