चोरट्यांचा घरफोडीत पाच लाखांच्या ऐवजावर डल्ला!

नाशिक (प्रतिनिधी) : वडाळा-पाथर्डी मार्गावर भरदिवसा झालेल्या घरफोडीत चोरट्यानी सुमारे साडे पाच लाखाच्या ऐवजावर डल्ला मारला. त्यात सव्वा लाखाच्या रोकडसह सोन्या-चांदीच्या दागिन्याचा समावेश असून याप्रकरणी इंदिरानगर पोलीस ठाण्यात घरफोडीचा गुन्हा दाखल करण्यात आला आहे. काशिनाथ बाबुराव शेवाळे (रा. लेन नं. ५, सराफनगर) यांनी याबाबत फिर्याद दिली आहे. शेवाळे कुटुंबिय शुक्रवारी (दि. ७) सकाळी अल्पशा कामानिमित्त घराबाहेर पडले असता ही घटना घडली. भरदिवसा अज्ञात चोरट्यांनी बंगल्याच्या खिडकीचे गज तोडून ही घरफोडी केली. घरात शिरलेल्या चोरट्यांनी बेडरूममधील कपाटात ठेवलेली सव्वा लाखाची रोकड व सोन्या-चांदीचे दागिने असा सुमारे ५ लाख ४० हजाराचा ऐवज चोरून नेला. अधिक तपास उपनिरीक्षक पाटील करीत आहेत.