अशोकस्तंभ परिसरात विद्यार्थ्यांमध्ये फ्रिस्टाईल हाणामारी!

नाशिक (प्रतिनिधी): खासगी क्लासमधील विद्यार्थ्यांच्या दोन गटात शनिवारी (दि. ५) तुंबळ हाणामारी झाली. ही घटना वर्दळीच्या अशोक स्तंभ भागात घडली. अशोकस्तंभ परिसरात अनेक खासगी क्लासेस असून दिवसभर या भागात विद्यार्थ्यांची मोठी वर्दळ असते. टिंगल टवाळीसह छेडखानीचे प्रकार सातत्याने घडत असताना शनिवारी दुपारच्या सुमारास अचानक दोन गट एकमेकांमध्ये भिडले. भररस्त्यात दोन गटात सिनेस्टाइल हाणामारी झाली. दोन्ही गटातील तरुण एकमेकांना लाथाबुक्यांनी बेफामपणे मारत सुटल्याने परिसरात भितीचे वातावरण निर्माण झाले. तर अनेकांनी आपले वाहने रस्त्यावरच थांबविल्याने वाहतूक कोंडी झाली होती. काही व्यावसायिकांनीही या घटनेचा धसका घेतला. या घटनेची माहिती मिळताच सरकारवाडा पोलिसांनी घटनास्थळी धाव घेतली. मात्र, तत्पूर्वीच टोळक्यांनी पोबारा केला. दरम्यान, याप्रकरणी सरकारवाडा पोलीस ठाण्यात उशीरापर्यंत कुठलीही नोंद करण्यात आली नव्हती. अशोकस्तंभ भागात खाद्यपदार्थ विक्रीची मोठ्या प्रमाणात दुकाने असून खासगी क्लासेसची संख्याही मोठी आहे. नजीकच महाविद्यालय असल्याने वर्दळ असते. त्यामुळे या भागातील गस्तीत वाढ करावी अशी मागणी होत आहे.