कोजागरीच्या पूर्वसंध्येलाच दूध दराने घेतली उसळी!

नाशिक (प्रतिनिधी): शरद पौर्णिमा अर्थात अश्विन महिन्यातील कोजागरी पौर्णिमेचा मुहूर्तावर दूध आटवून लक्ष्मीदेवीला नैवेद्य दाखविण्याची प्रथा आहे. दुधात मध्यरात्री पूर्ण चंद्राची किरणे पडल्यानंतर ते दूध प्राशन केले जाते, अशी परंपरा आहे. त्यामुळे कोजागरीला दुधाची मागणी दुप्पट होत असते. यंदा कोजागरीच्या पूर्वसंध्येलाच दूध दराने उसळी घेतली असून, दूधबाजारात दुधाचे दर १०० ते ११० रुपयांपर्यंत पोहोचले आहेत. मागणी वाढल्याने सर्वसाधारणपणे दूध दरात १० ते २० रुपयांनी वाढ झाली आहे. ऐनवेळी दुधासाठी धावाधाव होऊ नये म्हणून अनेकांनी दुधाचे आगाऊ बुकिंगही करून ठेवले आहे. दुधाचा रोजचा भाव ७० ते ८० रुपये लिटर आहे. मात्र, कोजागरी पौर्णिमेनिमित्त मंगळवारीच (दि. १५) मागणी वाढल्याने दुधाचे भाव ९० ते १०० रुपये प्रतिलिटरवर पोहोचले. तर बुधवारी दुधाचे दर १०० ते ११० पर्यंत वाढण्याची शक्यता आहे.